حلم ...يمكن ان يحدث لأى واحد

كتبت ساره درويش ما حدث لها فى منتدى اصدقاء البرنامج على الفيسبوك :انا والنت وله رابط هنا الى اليسار

من كام يوم حلمت اني مرعوووووووووبة علشان بقينا قرب الامتحانات وانا لسة ما اخدتش درس انجليزي وانا ضايعة بقى في المنهج وحاسة اني مش هنجح فروحت جري لمدرس الانجليزي بتاعي باع الثانوي واخدت الدرس واتطمنت نسبياً صحيت من النوم وانا حاسة اني واحشني اووووووووووووي درس الانجليزي وحشني اوي بيت استاذي .. كنت بروح هناك انسى الدنيا قبل ما هو يجي كانت مراته تقعد معايا ونقعد نتكلم ونحكي شوية رغم انها اكبر مني بكتييييييييييير وبنته تقعد تبص لي من بعيد لبعيد وبعدين بقت تيجي تقعد معايا وبعدين في مرحلة متقدمة بقت تحكي لي اللي باباها ومامتها بيقولوه عني وانا مش هنا :D ويجي الاستاذ بقى ونبدأ الدرس وكالعادة على قد ما مبسوط من شطارتي على قد ما مخنوق من اني مش بخليه يكمل جملة على بعضها وانا اكملها وطول الدرس عمال يحكي لي عن تلامذته الاغبياء وعن خنقته منهم ويقعد - كل حصة - يقنعني ادخل علمي مش ادبي ، علشان انا انسانة عملية كنت باخد الدرس في الصالة وكانت مراته تبقى سامعة الدرس وممكن في وسط الكلام تقول تعليق ونقعد كلنا نتناقش فيه او نضحك او نتريأ كنت بحس اني جزء من حياتهم وبجد بنسى كل الدنيا لما اروح درس الانجليزي آخر سنة ليا بقى معاهم كانت مراته تقول لي " هتوحشنا رنتك للجرس يا سارة .. ماحدش بيرن الجرس برقة كده زيك هتوحشينا اوي " كانت عنيا تدمع واقولها يا طنط هاجي ازوركم اكيد بس ما تزهقوش مني فتقول لي لو جدعة بجد اعمليها وما تنسيناش النهاردة بجد كنت حاسة اوي اني محتاجة دنيتهم محتاجة اروح درس الانجليزي وانا ماسكة الكشكول والكتاب والمذكرة محتاجة ارجع تاني جزء من عالمهم اتصلت بيهم اخد ميعاد مراته ردت وصوتها مهموم .. ما فيهوش حرارة كل مرة بتكلمني بيها ومع كل ثانية في المكالمة كانت كلمتي " انا عايزة اشوفكم النهاردة ، حضرتك والاستاذ فاضيين ؟؟ " بتموت على لساني وفي الاخر نهيت المكالمة وانا بقولها " اصلكم وحشتوني وكنت عايزة اتطمن عليكم " حرارة صوتها رجعت بعد فواات الاوان وهي بتدعي لي وفرحانة اني بسأل وبس ... و مش علشان عايزة منهم حاجة كنت محتاجة اوووووووووووي درس الانجليزي .. لكن اكتشفت اني كبرت ، وماليش مكان في الحصة :(