هل ستتركهم يتجسسون عليك ؟اقرا الموضوع جيدا وهو حلقه قبل ان تجيب

لوكنت سمعت عن جوجل فانت من اهل الأنترنت يعنى واحد او واحده من ال12 مليون مستخدم للنت فى مصر ولمن لم يدخل عالم النت بعد نقول ان جوجل اسم موقع على النت للبحث ....البحث عن ايه؟ اى حاجه وكل حاجه عايز مثلا تعرف كده كام وصفه لعمل المكرونه ....الكمبيوتر شغال ومتصل بالنت ....كل ما عليك تزور موقع جوجل وفى مستطيل كبير خالى فى اعلى الصفحه اكتب : وصفات المكرونه واضغط بالماوس الظريف على كلمة ابحث ....فتفاجأ بسيل من وصفات المكرونه من كل انحاء العالم ....نقى بقى ياعم الوصفه السهله اللى تعجبك وبالهنا والشفا احتمال كبير كمان يظهر امامك على الشاشه غير الوصفات عناوين مواقع فيها معلومات عن المكرونه لا تخطر على البال نفس الخطوات حتتبعها لو حبيت تسال عن اى موضوع ....وكلمة اى هنا مش مبالغه...فعلا ممكن تسال عن اى موضوع ....والمشكله مش فى ظهور المعلومات ام عدم ظهورها لأنها حتظهر حتظهر ....المشكله ازاى الواحد ميغراش فى بحر المعلومات ....دى عايزه خبره شويه ....ما علينا مش ده موضوعنا الخدمه العظيمه المجانيه دى تخليك تسال ....موقع البخث جوجل ملك لشركة جوجل ...طيب الشركه دى منين بييجى دخلها لما هى بتقدم خدمة البحث بالمجان ....مش فيها موظفين ومصاريف الى آخره؟ صحيح انه روبوتات هى التى تقوم ليلا ونهارا بمسح ألاف المواقع على النت لمعرفة اين توجد المعلومات فى كل مجال وتخزن ما تتوصل اليه فى كمبيوترات كبيره ...حتى تطلب انت البحث فى موضوع فتوافيك ذاكرة هذه الأجهزه بما تريد ...وعلى الفور لسه سؤالك عن دخل الشركه لم يجد جوابا ...والجواب فى كلمه واحده الأعلانات مع وصفات المكرونه مثلا ستظهر اعلانات ....قد تهمك فتضغط عليها لتعرف التفاصيل او لا تهمك فلا تعيرها اى اهتمام دخل جوجل من الأعلانات التى تضغط عليها لتعرف تفاصيل اكثر وطبها لن تضغط الا على الأعلان الذى يهمك ....ولذلك قررت شركة جوجل ان تظهر لك فقط الأعلانات التى تهمك وطبعا لو متابع كويس ماقلناه حتسال على طول : وجوجل او شركة جوجل حتعرف منين ايه اللى يهمنى ....هية كانت جوز خالتى والأجابه ياصديقى من اهل النت بسيطه للغايه شركة جوجل طبعا مش قريبة حد علشان تعرف ميوله واهتماماته ....ولكنها تستخدم طريقه اخرى ....البسكويت .....لأ مش حتاجر فى البسكويت والكحك ....اللى حيحصل من هنا ورايح كل ما سيادتك تبحث عن شىء فى موقع جوجل ....وصفات المكرونه زى ما قلنا مثلا ....سيضع موقع جوجل فى جهازك قطعة بسكويت ....آه والله اسم برنامج التجسس الصغير الذى سيقبع فى جهازك ....البسكويته طبعا مهمته هى معرفة انواع المواقع التى تزورها ....فمثلا لو كنت زائرا مستمرا لمواقع السفر والسياحه ....ستجد عند زيارتك لموقع جوجل للبحث عن اى موضوع اعلانات عن السفر والسياحه طبعا البعض يعتبر هذا تجسسا ولكن آراء اخرى لا تعتبره كذلك ....فلنسال زوار مدونة البرنامج على النت ويمكن الدخول الى المدونه من موقعنا الذى نذكر عنوانه حالا