عم يا بتاع الجرايد ياللى واقف ع الرصيف مد إيدك وخد منى جنيه وأديلى جرنان نظيف ماتكونش أخباره بتستهبلنى عايز جرنان يزوّد ثقافتى وف أسلوبه يحترمنى ومايكونش سبب رفع ضغطى من نشر أخبار تصدمنى مش عايز جرنان مانشيت عايز جرنان مضمون أخباره ماتخليش عقلى يشت وتطلعنى م الهدوم ولا جرنال حكاوى يضحك عليا بحكايه أتقالت ف قاعده قهاوى أو منقوله من رواية ولا يكون التهويل أسلوب عنده وطريقه ولا يكون من اللى بيولعوا الفتيل وعايزينها تبقى حريقه عم يا بتاع الجرايد عايز جرنال الحقيقه تكون أخباره بجد ويكون ظريف الطريقة ميكونش بيجرّح ف حد وتكون أخباره دقيقة وما يخليش الدنيا سد وما يفتريش ع الناس البريئة عم يا بتاع الجرايد هى دى طلباتى يا ترى جرنالى عندك ولا أنا بهاتى ولو يا عم طلبى مش ف الإمكان خلاص بدال الجرنال أدينى بالجنيه لبان
هناك تعليقان (٢):
جميل جدا كلماتك وياريت نلاقى الجرايد متنشرش غير الحقيقة دلوقتى الكل بيدور بس على السبق الصحفى حتى لو كان المنشور ده خطا للاسف هذا ما يدور وسنستغرق وقت حتى يتفهموا اننا بيقينا نعرف الجرايد دى واحد واحد وبيقينا بس نشترى من هو صادق فى اخبارة
تحياتى
احمد سمير سوهاج
الصحافة الصفراء فى مصر خصوصا هى نتاج عصر الفهلوة
وجودها كان يكمل منظومة الفساد فى مصر
وقد حان الوقت لإزالة كل الألوان الصفراء من حياتنا
لابد من الاهتمام بالتعليم والإعلام
فبهما نخلق جيلاً جديداً قادراً على بناء مصر الجديدة
نداء خاص للبلطجية ومثيرى الفتن:
كلنا فى مركب واحد يتخبط فى قلب عاصفة بوسط المحيط
وأنتم مصرون مصرون على تكسير المجاديف وثقب المركب
ستغرقون أيها الأغبياء
إرسال تعليق