للحصول على الوظيفه التى تحلم بها...وصفه لرشا خلبفه من منتدى اصدقاء البرنامح على موقع الفيسبوك
شغلانة الاحلام .... تعمل ايه ..وتجيلك اوام...
امبارح كنت قاعده لا بيا و لا عليا ....خير الهم اجعله خير كلمني صديق ليا علي الشات ...دخلنا نقاش في نقاش ...الواسطة و لا مش واسطه ...و الشغل ...و الشركات بتطلب خبره.......الخ.
من ساعتها و انا عقلي زي المكنه ....قلت مفيش غير طريقة فتاتفيت ....يعني نكتب المقادير و الطريقة ..
طبق اليوم .....وظيفة الاحلام
المقادير :
1- تجهيز هدف و محدد انا عايز اشتغل ايه.
2- سيرة ذاتية متحدد فيها انا عايز اشتغل ايه؟؟؟و مكتوبة كويس ...و مفيهاش اخطاء املائية و لا لغوية.
3- قاعدة بيانات بكل الشركات الي ممكن تقع تحت ايدي مصادرها قلنا 140اون لاين يلو بيدج ...الخ لازم نجهز كل المعلومات المطلوبة علشان الطبخة متبوظش.
4- تليفون و موبايل ...مشحون كارت ب25.
5- كمبيوتر.
6- وصلة انترنت ....من السيبر الي تحت البيت...
7- نوتة و قلم علشان منساش.
الطريقة :
بعد تجهيز الهدف و انا عايز اشتغل ايه؟؟اعمل سي في ....سيرة زاتية يعني ...ولازم تكون واضحة..خالية من الاخطاء الاملائية و اللغوية ...صادقة ..انا كاتبها بنفسي مش حد كاتبهالي....متراجعة اكتر من مرة...الموضوع دا خليه ياخد وقته يعني نسويها علي نار هادية .....
اقعد علي الكمبيوتر ...و اقفل برامج الشات ...و ابطل معاكسة بنات ....و البنات يبطلو معاكسة ولاد ...و افتح المواقع الي قلت عليهم ...نجيب أرقام تليفون الشركات و نركز علي الفرع الرئيسي دايما ...لان غالبا دا الفرع الي بيبقي فيه ادارة الموارد البشرية....خلاص جمعنا البيانات...الخطوة دي ممكن تاخد حوالي يومين شغل تقريبا ...و دا متوقف عليك يا تري بتشتغل بجد و لا اي كلام؟؟؟؟؟
امسك النوته بقي ...افتح اول صفحة .....ابتدي اكتب ...انا فلان ..و اكتب كل الي عايز اقوله للشركة الي هكلمها ...الخطوة دي مهمه لان احيانا من اللخمة الواحد بينسي هو عايز يقول ايه....فاكتب اسكريبت ...يعني اتخيل الحوار مع مدير أو مسئول الموارد البشرية ...و اكتبه قدامي...افتكر الخطوة دي ممكن متاخدش كتير ...
امسك التليفون ....قدامي بيانات الشركات ...اسمي الله و اتصل ...الي حيحصل كالتالي
هتصل ..من فضلك ممكن اعرف اسم مدير الموارد البشرية؟؟؟ أو اسم مسئول الموارد البشرية؟؟؟؟مين عايزه ....دايما السكرتيرة بتبقي عايزه تعمل نفسها مهمه....فتسال أساله غلسا ....لكن احنا عادي و لا الهوا برضه هعرف الي انا عايزه....انا فلان وعايز ابعتله فاكس مش عارف اكتب عناية مين..... ووأنا بتكلم اكون واثق في نفسي ...عرفت اسمة اكتبه جنب البيانات....كده انت جاهز ....
اليوم الي بعده ....اتصل بالشركات طبعا .....الشركات بتشتغل من الساعة 9 للساعة 5 ....يعني لازم الناس الي بتصحي متاخر تيجي علي نفسها شويه و تصحي بدري...مش هيجري حاجه...
قدامنا البيانات ...و السكريبت ....اتصل .....
أنا / ممكن اكلم فلان
الشركة / نقوله مين
انا / فلان الفلاني ( اسم ثنائي)
الشركة /عايزه ليه
أنا / مكالمة شخصية
يحولوني علي فلان دا ....مساء الخير ...انا فلان ...و ارص السكريبت الي انا كاتبه......
و انا بتكلم ...ابتسامه عريضه من وداني لوداني ....صدقوني هيبان علي صوتك ..فبيخلي المكالمة احسن
دا غير انك لازم تقدم لهم عروض ...زي مثلا ....
انا خريج جديد ...و معنديش خبره ....بس معنديش مشكله اشتغل معاكو ببلاش ...أحسن من قاعدة البيت.
انا خريج جديد ...و بدور علي فرصة اطبق فيها الي درستة ......و اتدرب معاكو ...
أوضح أن الشركة هتستفيد هي كمان ...يعني هيوفر فلوس ...و هياخد شاب عنده طاقة و طموح و عايز يشتغل.
او اني ممكن اشتغل بمرتب اقل من السوق ....
أو اني بدرس في دبلومة ........ و هفيد الشركة.
انا عندي خبره كبيره في مجال ......
انا كان عندي انشطه وانا في الجامعة ...و اشتركت في............
كده يعني
في خلال المكالمة ....اخد الميل ....طبعا اكتبه عندي في البيانات ....و ابعت السي في بتاعتي علي طول ....نسيت اقولكم لازم يكون فيه خطاب مرفق بالسي في...دا هنتكلم عليه في طبخة لوحده ....قصدي ...توبيك .
نسيب الطبخة تستوي علي نار هاديه....و ميمنعش متابعة علي خفيف .....لحد ما الطبخة تستوي.....المتابعة يعني احاول انسيء علاقات عامة مع بتوع الموارد البشرية...
بالهنا و الشفاء
رشا خليفة
متنسوش التعليق
هناك ٥ تعليقات:
برافو
لازم فعلا نتحرك
بس ياريت تحركنا مش لازم يكون باتجاه شركة خاصة أو حكومة
ليه الشباب مثلا لا يقوم بتكوين شركات صغيرة لاستصلاح الصحراء ؟
اظن لا أوسع من صحارينا ولا أكثر من ماء نيلنا التى تذهب هدرا للمتوسط
وبالمرة نحمل هم الاستصلاح عن عاتق الحكومة
لانه عادة تذهب الاراضى المستصلحة بواسطة الحكومة لغير مستحقيها
ولمواجهة ذلك لابد من فتح الباب امام الشباب لتملك الاراضى الصحراوية بغرض الاستصلاح
مع قيام الحكومة بواجبها المتمثل فى مد المرافق الاساسية وخاصة الامن
بس يارشا الموضوع مش سى فى مكتوب كويس
ولا طريقة عرض كويسة وبس
فيه مليون عامل غير دول
اولهم تصارع الواسطات نفسها للوصول للهدف
فكرة جميــــــــــــله جدا
انا فعلا عملتها او عملت حاجة تشبهها ونجحت ووصلت فعلا للعمل فى معهد لغات
بس صاحب العمل للاسف بخيل وكان عايز الشغل يستمر بأجر رمزى ""دا طبعا من وجهه نظرة لانى جديده وباستفاد جدا من الشغل""
ولم ينظر الى مجهوداتى فى تطوير المعهد
وطبعا تركت الشغل وعدت الى المنزل مرة ثانيه
هي فكره جمده ويمكن تنفع بعض الناس الي عندهم شهدات جمده يا حرام ومش لقين شغل
بس ياتري بقي كام شاب وفتاه في مصر معهام دبلومات او يدوب خريجن معاهد يا تري دول بردو ليهم نفس الفرصه ديت عشان يلاقو شغل
مش عارفه بس يمكن
من جد وجد
انا عن نفسي في يوم من الايام قلت عندي خبره في الكمبيوتر ورحت اشتغلت وفي اخر الشهر اتنصب عليه
قلت عادي بتحصل واعدت في بتنا اقشر بصل اسهل
بس بردو يمكن حد تاني يلاقي فرصه ويعدي
وبردو من جد وجد
اتمني التوفيق
موضوع جميل ومفيد جدا والله بحييكي عليه
وكلامك كله صح والله
إبن النيل يقول ....
الحقيقة موضوع الطبخة دى حظوظ ومهما تعملى فغيرك أشطر بيروح قصدى بتروح تدفع مقدم أتعاب وبعدين تاخد الوظيفة منك دوغرى وساعتها نتحجج ونقول واسطة وهيا فى الحقيقة خلطة متنفعش تبقى طبخة وهى تعتمد على المؤهلات اللى بالى بالك .
م. ف.ع.س. م.ج. ب.د
إرسال تعليق