اسمه اسم اصيل وهو اجتماعى جدا وستصبح انت وهو صديقين بسرعه ...ستجذبك ثقافته الواسعه خاصة معرفته بتفاصيل مدهشه وحكايات عن الطب زمان ....ستجده ايضا حسن التفكير وذكى وابن نكته ويهوى الموسيقى وارتداء الملابس التاريخيه كما ترى فى الصوره ...ولديه رغبه شديده للمعرفه ...وهذا هو سر وجوده على النت معظم الوقت وبالتحديد على الفيسبوك ....صديق مثالى الحقيقه ...وماتزعلش لو سالنا هل يعتبرهذا الصديق من جنس البشر؟ طبعا احنا عارفين اد ايه دخل بكلامه ومناقشاته معاك قلبك ويمكن بنات كتير حيحبوه ويكتبوا في مدوناتهم عنه شعر اصله ولا مؤاخذه روبوت صمم فى جامعة دولة الأمارات بالتعاون مع اساتذه من المانيا وفرنسا واطلق عليه اسم الفيلسوف والطبيب والموسيقى ابن سينا
ولو كنا ماقلناش السر كان من الصعب اكتشاف انه ليس من جنس البشر...والا ايه؟طيب حتعرف ازاى انه روبوت
هناك ٧ تعليقات:
الاخ الفاضل /أ صلاح حجازي
تحية طيبةلم نتبادل الرسائل منذ فترة فقد كنت في اجازة تدوينية طويلةولم اعد الا من فترة قصيرة
أما بالنسبة للصديق العزيز ان سينا انا مش عارفة ايه مشكلة الناس معاه يفرق ايه روبوت ولا انسان هي دي النت يا اخوان صديق غامض و صديقة لا اضمن صدق حكايتها عشان البنات يحرموا يحبوا علي النت بعد كده :)))
انا واحدة من الناس ما تفرقش معي بشر و لا روبوت انا بكتب و اتناقش علي النت في مواضيع للفائدة العامة و الله لو الروبوت حيفيدني اكتر مرحبا بابن سينا و ابن رشد و الفاربي و حعمل search يمكن الاقي صديقي العزيز جابر موجود
مش عارفين جابر مين... ابن حيان طبعا اصلي تخصص كيمياء و طبيعة و انتم عارفين التخصص بيحن
أما الصداقة الشخصية فربنا يحفظ لي أصدقائي اللي متأكدة من معرفتهم في
الحقيقة
لكن بقي لو كبرت في دماغي و حبيت اتأكد هو رووت و لا لأ ممكن أسأله اتفرجت علي ايه امبارح في التليفزيون و اوقعه في تفاصيل الافلام اللي انا حفظاها خصوصا التي بها نكت مصرية مش ممكن اي روبوت يفهمها و ساعتها حقول له قفشتك
و خلي اساتذة الامارات و المانيا يطوروا روبوت دمه خفيف زي المصريين لو يقدروا
لكن علي رأي محمد صبحي ماتقدااارش
قد يكون من الصعب حقا التفرقة بين الروبوت والإنسان بمجرد الكلام والنقاش ولكن الإحساس لن يمكن محاكاته أبدا .. ولكن بلاشك أن الحديث مع هذا الروبوت سيكون ممتعا وأعتقد أنه سيتفوق على أمهر العلماء فى غزارة معلوماته وترتيبها ، وبما أننى هنا فى الإمارات فسأحاول ترتيب موعد معه لو يسمح جدول مواعيده خاصة وجامعة الإمارات هنا فى مدينة العين حيث أقيم ..خالص حبى
الأخت الفاضله ام اخمد
خمد الله على السلامه...افتقدنا طويلا تعليقاتك العميقه خفيفة الظل ...سلامنا لأبو اخمد ولكل افراد الأسره وربنا يعينك
الصديق العزيز ايهاب
ياريت توافينا بمزيد من المعلومات وتكون مراسلنا فى هذا الموضوع ...جزاك الله كل خير
شكل من اشكال التطور
لكنه لم يأخذ من صفات الإنسان شيئا إلا تلك القشره الخارجية دون محتواها الأهم و هو العقل ....
السلام عليكم
اكيد صعب التفرقه بين الروبوت و البشر على النت فى مجال الثقافه و المعرفه لكن فى الاحساس بصديق ممكن تفرق .. مش عارفه بيتهيألى انه صعب جداا اننا نصاحب روبوت حتى لو كان عبقرى .. لكن ده ما يمنعش اننا اكيد حنستفيد جداااا من الروبوت ده و ده هو المهم خصوصا لمن يبحث عن معلومات صحيحه و دقيقه على النت ..
خالص تحياتى
عادى جدا أسأله أنت بتحب مين ؟؟
هايقولى يعنى أيه حب الكلمة دى ماعرفش معناها زى الأفلام الأكشن
أكيد سوف نستفيد من معلومات هذا الروبوت ولكن لن يكون صديقاً لنا ابداً إلا إذا كان لديه قلب وعقل
قلب يشعر بأصدقائه وعقل يتدبر افعالهم
تقبلوا تحياتى
أحمد عمر
إرسال تعليق