قال البنات مش عاوزين شبكه وللتاكيد على جديتهم وصدق نواياهم الفوا جروب على الفيسبوك لنشر هذه الفكره....طبعا الشبان رحبوا وقالوا واحنا مش حنجيب شبكه وكونوا هم كمان جروب على الفيسبوك
عاوزين نسمع افكارهم منهم نفسهم وتعليقاتكم لأعداد حلقتين من برنامجنا عن الموضوع
على فكره اسهل طريقه للدخول الى الجروبين على الفيسبوك هو كتابة كلمة شبكه فى خانة الريسيرش فى الفيسبوك بعد مايتم اللوج ان
الاشتراك في:
تعليقات الرسالة (Atom)
هناك ٣٦ تعليقًا:
ياترى الكلام بجد وبحق وحقيقى
هذا ما ستسفر عنه الايام المقبلة
قصدى الجروبات :)
اصدقائى الأعزاء
اهلا وسهلا بيكو وبارائكو واقترحاتكو
تمنياتنا للجميع بدوام التواصل
و لو العريس مشبكش العروسة مش ممكن كده تقع منه في المستقبل
؟؟؟
المشبك اقصد الشبكة ضروري بس مش لازم تكون غالية قوي
اوروفوار
بصراحة مع الظروف الإقتصادية الحالية الشبكة بقت رفاهية
كفاية على اتنين بيبدأوا حياتهم شقة و مهر و عفش
و دبلتين لو لزم الأمر
بسم الله
المشكلة ليست في الشبكة ولا في المهر ، المشكلة نجدها في مجرد الفكرة في الزواج فقد أصبح التفكير فيه في حد ذاته مشكلة ، لذلك أجد أن هذه المبادرة على قدر لطافتها وأهميتها تبعث على النكد لانها تقر أننا صرنا نتجاوز ونتجاوز حتى أننا في انتظار اليوم الذي نتجاوز فيه عن فكرة الزواج نفسه .. ،هههههه
وافتكر ان شبك شبكنا شبك في شبك شبكم ، يقدر شبك شبكم يشبك شبك شبكنا من غير ما يشبك شبك الجيرااااااااااااااان
انا بقي رغم اني طلبت من عريسي انه مايجبش شبكة ونستغل تمنها في حاجة تنفع بس هو صمم وأصر وقال الشبكة دي من مقامي وانا لازم اشتريلك شبكة
وبالفعل اشتري شبكة وبعد سبع شهور من الجواز بعنا جزء منها عشان مصاريف الولادة
وبعد خمس سنين كمان بعنا الجزء الباقي منها وفوقيه دهبي اللي ماما كانت شارياه عشان يكمل تمن العربية
وبكدة اللي اشتراهولي هدية اخده وفوق منه هدايا مامتي ليا
مش كان بلاها شبكة من أساسه وكان زماني متهنية بهدايا مامتي ليا
وعليه العوض ومنه العوض
bastokka طهقانة
اهلا وسهلا بيكى صديقة للبرنامج وزائرة للمدونة
يا عزيزتى فى ظل الظروف الاقتصادية الجامدة اللى الناس كلها عايشاها
اعتقد ان الشبكة اصبحت من الرفاهيات
تمنياتنا بدوام التواصل
عاشق مصر
اهلا وسهلا بحضرتك صديق للبرنامج وزائر للمدونة
هو اعتقد ان الشبكة والذى منه بيكون هدية العريس للعروسة الاهل ايه اللى بيدخلهم مش فاهمه
هما بس يخرجوا منها وكل حاجه هتبقى تمام
تمنياتنا بدوام التواصل
متمو
اهلا وسهلا بحضرتك صديق للبرنامج وزائر للمدونة
فى ظل الظروف الجميلة التى نحياها جميعا
هو المفروض نرجع كسابق العهد
وزوجتك نفسى وانا قبلت
والاشهار وبلاها شبكة وبلاها شقة
ومش مهم اى حاجه
بتكلم بجد المهم الناس تتجوز
تحياتى
تمنياتنا بدوام التواصل
المـــفـــــــقــــــــوعـــــة مــرارتـهــا
اهلا وسهلا بيكى صديقة للبرنامج وزائرة للمدونة
انا حاسه انه لعبها صح وصح الصح كمان
اه طبعا دى هديتى ليكى يا سوسو دى قيمتى يا حياتى اتارية يا سوسو كان بيرسم على الهدايا كمان فيما بعد
انتى مش تستكى عن حقك وتطالبى بالعربية هدية
هههههههههههه
انا جاية اهدى النفوس
شرفتينا يا جميل
تمنياتنا بدوام التواصل
السلام عليكم ورحمة الله وبركاته
عن نفسي مقتنعة جدًا بالموضوع ده
ورأيي أن كفايا أوي دبلة تدل أن الأتنين دول في علاقة شرعية تربط بينهم لو خرجوا في اي مكان وخلاص
لكن للأسف كل الجوازات اللي حوليا بتتعامل من المنطلق ده يا العروسة أو بالتحديد يطلبوا شبكة بمبلغ وقدره يا أما العريس يصر على شراء شبكة حتى لو ظروفه لسه في البداية يعني بحجة ده مقامي وعمر ما كان قيمة العريس والعروسة في معدن أيا كان سعره
وده رأيي من قبل حتى جنون الذهب اللي هو فيه ده وبقى سعره عالي
تحياتي
جيهان علي
اهلا وسهلا بيكى صديقة للبرنامج وزائرة للمدونة
عارفه يا جيهان المشكلة كمان مش فى العريس والعروسة بس
المشكلة كمان فى تدخل الاهل
وتلاقيهم يقولوا لك اشمعنا بنت خالتها جاى لها شبكة بمش عارفه كام وهى اقل من بنت خالتها
ولما تدورى على بنت خالتها مش تلاقى
تمنيابتنا بدوام التواصل
الأخت العزيزه المغقوعه مرارتها
تحيه طيبه وشكرا على تعليقك ولأهميته كتجربه واقعيه سيكون ان شاء الله بين التعليقات المذاعه ولكن فيه مشكله صغيره وهو السم لا نستطيع ذكر المفقوعه مرارتها فى الذاعه الرئيسيه لمصر (لو على معنديش مانع اقول له)فلو سمحتى تقول لنا يا اما اسمك الأول مثلا او لو رغبت الأسم بالكامل او اى شىء يرمز او يدل عليك
ودايما تكونى معانا
هو الموضوع جميل جدا من الناحيه النظريه بس مين العريس الشرقى اللى هيقتنع بعروسه من غير شبكة
دة فكر شرقى يعنى الاستاذ العريس لو مادفعش هيقول دى عروسه ببلاش وفى لحظة ممكن يسيبها واحنا ماشين على المثل القائل الغالى منه فيه
انا شايفة ان الشبكة مش مهمة اوى فى الوقت اللى احنا فية بسبب الاسعار المرتفعة و ممكن تبقى حاجة بسيطة تحياتى
طلبت من منى الشيح عضو جروب من غير شبكه ان تروى لنا قصة الجروب والفكره فكان هذا ماكتبته ونحن نشكرها
زواج من غير شبكه ولا مصاريف باهظه
بس كده قصه نشاه الجروب
دعاء العطار صاحبه الفكره كانت من فتره طويله كده
نزلت موضوع على مدونتها الخاصه
إسمه رفقاً ياعمى رفقاً
http://dodoo22.blogspot.com/2008/02/6000-12000.html
وكانت فى اخر بتطالب بحمله يكون غسمها عروسه من غير شبكه
وبالفعل بعدها بمده راحت عرضت الفكره على الدكاتره فى الجامعه
وعلى أصحابها وطبعاً أنا كنت منهم
المهم سجلت مع الناس فى الشوراع ولقت تأييد من ناس كتير
والدكاتره عندها فى القسم وعدوها بإنهم هيعملوا ندوات فى كليه أداب
وهيبقى نشاط رسمى فى الكليه
بس طبعاً لان الفكره بدأت فى نهايه العام الدراسى فكان طبيعى إنها توقف التنفيذ
بس عرفنا بقى الفيس بوك وعرفنا نشتغل عليه
قمنا عملنا جروب عروسه من غير شبكه
وطبعاً الأسم خدناه من أخر كلمتين فى مدونتها
وللتوضيح ده مجرد إسم
يعنى إحنا مش غرضنا الشبكه بس
لاء إحنا نقصد التقليل فى أى تكاليف للزواج
والكلام ده وضحته قبل كده
--------------------
To reply to this message, follow the link below:
http://www.facebook.com/n/?inbox/readmessage.php&t=1012929756615
___
السلام عليكم
أنا مبسوطه قوووى إن الموضوع بدأ يتناقش فى المدونات
وأتمنى من الجميع الأنضمام لنا
ومشاركتنا فى الأفكار
و كمان الأستفتاء بتاع الجروب
http://www.facebook.com/topic.php?uid=41848190149&topic=4619
هي الشبكة مش مهمة قوي كقيمة مادية لأن ببساطة العريس لو عايز يسيب العروسة ممكن ببساطة يضايقها لحد ما تفسخ هي الخطوبة وياخد الشبكة تاني ، فالماديات عموماً ممكن تقليلها لأقل حد ممكن لو كان العريس شاري العروسة .. بس هي المشكلة هل هو شاريها ومقدر تضحيتها بالشبكة والا لأ ؟ .. ممكن واحد يكون مقدر ده لو بيحب العروسة حقيقي وفاهم إنها بتضحي بالشبكة عشان عايزاه ومتمسكة به ، لكن ممكن واحد تاني يستهتر بالعروسة لو هو مش بيحبها وواخد واحدة والسلام .. ممكن يفكر لو هو تفكيره وحش إنها مش لاقيه حد يعبرها عشان كده اتنازلت عن الشبكة ، لكن لو عدد كبير في المجتمع اتنازل عن الشبكة هيتحول دا لعرف ويبقي عادي .. مين بقي اللي هيبتدوا الخطوة الجريئة دي الأول ؟
رئـــــيسـة حزب الأحلام
اهلا وسهلا بيكى صديقة للبرنامج وزائرة للمدونة
اعتقد يا سلوى مش كل العقليات كدا فى ناس فعلا بتتخطب بدبلتين وباقى فلوس الشبكة بيقولوا نستفيد بيها فى فرش الشقه
لكن برضه فى ناس عقلياتها ما زالت فى العصر الحجرى وبتقول يبقى كدا ببلاش او عرسوة وحشه واهلها عايزين يخلصوا منها هههههههههه
تمنياتنا بدوام التواصل
دعوة للأمل
اهلا وسهلا بيكى صديقة للبرنامج وزائرة للمدونة
هى المفروض يا سالى ان الشبكة بتكون هدية من العريس للعروسة يعنى المفروض الاهل مش يتدخلوا فيها
لكن نعمل ايه بقى التحكمات
:)
تمنياتنا بدوام التواصل
mnoon
اهلا وسهلا بيكى صديقة للبرنامج وزائرة للمدونة
بالتوفيق يا منون للجروب بتاعكو
تحياتى ليكى
وتمنياتنا بدوام التواصل
Lamia Moukhtar
اهلا وسهلا بيكى صديقة للبرنامج وزائرة للمدونة
حقيقى يا لميا كلامك فعلا وممكن واحد برضه يكون بيحبها وبمجرد ما تتنازل عن الشبكة يدور فى عقله الالاف من التساؤلات اشمعنا مش قالت مش عايزة زى بنت خالتى
يمكن يا شيخ مش عندها بنت خاله وعندها بنت خال لسه صغيرة ههههههه
هى المشكلة فى البداية منتظراها معاكى
تمنياتنا بدوام التواصل
اصدقائى الاعزاء المدونين والمدونات
غدا 10/8/2008 يتم اذاعة حلقة عن مدونة " يوميات نائمة فى الأرياف "
فى برنامجنا الإذاعى
أنت تسأل والكمبيوتر يجيب
والذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
كما يمكنكم سماع الحلقة مباشرة فى نفس موعد إذاعتها الساعه 9.10 صباحا من خلال موقع البرنامج
http:dear.to/cairo
تمنياتنا للجميع بدوام التواصل
رغم انى مش عارف ايه علاقة مناقشة مسألة الزواج و الشبكة فى برنامج الكمبيوتر
لكن ان شاء الله هاسمعه و اشوف الكمبيوتر هايقولنا ايه و يجيب ازاى
نتمنى ان المجتمع المصرى يغير كتير من عاداته المخالفه لواقع الحياة ، و يساهم فى تنمية أبناءه و مساعدتهم و لو حتى بالتغاضى عن التكاليف اللى تقسم ضهر اى شاب بادىء حياته و هى تكاليف الزواج
Fouad Hussien
اهلا وسهلا بحضرتك صديق للبرنامج وزائر للمدونة
بما فى الوقت الحالى الكمبيوتر هو الحل الاسهل لجميع المشاكل وهو وسيلة التواصل بين الناس وبعضها فى كل العالم
اذان انت تسال والكمبيوتر يجيب مع كل الناس ولكل الناس
سعداء بتشريف حضرتك
تمنياتنا بدوام التواصل
الأخ فواد حسين
سعداء بمرورك ونتمنى ان يستمر التواصل اما بخصوص سؤالك عن علاقة الكمبيوتر بموضوع اجتماعى فالأجابه فى معرض مقام حاليا فى سنغافوره وهى من الدول التى تقدمت فى تكنولوجيا المعلومات والمعرض فكرته سبق اليها البرنامج من سنوات والفكره باختصار هى ان الكمبيوتر وسائر منتجات التكنولوجيا تظهر فى مجتمع معين بافكار وتقاليد معينه باختصار فى ثقافه معينه وبالتالى تتاثر هذه المنتجات بهذه الثقافه فتبرع دول وتتخلف دول فى مجال التكتولوجيا والمعرض فى سنغافوره يعتمد على خيال فنانين من مختلف دول العالم ماعدا المنطقه العربيه طبعا فعلى سبيل المثال ابتكر فنان من استراليا خريطه صوتيه لسنغافوره فمثلا اذا وضعت اصبعك او اشرت بالماوس الى بورسعيد استمعت الى اغانى السمسميه وهكذا ملخص الكلام لن يكون لنا مكان فى عالم التكنولوجيا والمبتكرات اذا ركزنا فقط على الهارد ديسك والرامات الموضوع اوسع من ذلك بكثير
ارجو ان اكون قد اجبت على سؤالك واهلا بك وهذا الكلام سيكون موضوع حلقه من البرنامج
لو ما جابش شبكه ممكن يسيبها فى أى وقت. و الحكايه هاتبقى لعبه.و بعدين الشبكه تعبير مهم جدا عن الحب و التقدير. أهم من الديش و الميكروويف و التكييف و الستاير
معلش انا عندي اعتراض الرسول صلي الله عليه وسلم عندما جاءة رجل وقاله انه مش ميقدرش يشتري شبكة لعروسته قال له رسول الله التمس ولو خاتما من حديد
ديه عادات وتقاليد وحاجات قالها الدين مش معني كده انه بيشتريها لاء حتي لو حاجه بسيطة دي بتعبر هدية من العريس مش لازم تكون غالية كل واحد علي قده لكن نمنعها خالص اعترض اعتراض شديد
غير معرف
اهلا وسهلا بك وشكرا لأنك لفت نظرنا للأساس الدينى للموضوع
ولكن الا ترى انه لا تعارض بين السنه النبويه المطهره لو نظرنا بعمق لمغزى القصه التى روتها كتب السيره وبين هدف هؤلاء الشبان وهو تسهيل الجواز ....وعدم المغالاه فى مصاريف قد تعوق الشاب وهو فى مستهل حياته بالنظر الى الظروف الأقتصاديه؟
مره اخرى شكرا على مرورك
لماذا قد اْرى انه قد يساء احيانا فهم الحرية المعلوماتية بما تتطلبه من فكر وابداع يرتقى من مستوى الواقع عبر تداول وتبادل الافكار واتاحتها للمناقشة على المستوى الفضاء الافتراضى , ما ذهبتم اليه يعتبر شطحاّ فكرياّ ليس الا اتى نتيجة كبت حرية الراْى والتعبير اذا يتاح فجاْة ودون انذار مسبق تلك الحرية بدون ضابط ما يعننى فى القضية ان مثل تلك الحلول فى راى غير عملية فى المقام الاول ايه السادة الكرام لا ادعوكم بفرض قوة الشباب الى الضرب بقيم المجتمع وتراثه الثقافى عرض الحائط كيف ترون ان حلول مشاكل الشباب حلا جذريه يقتضى الغاء جذور المشكله من الاساس دون تهيئة الاجواء لتقبل التداعيات المتخلفة عن ذلك الامر زملائى الاعزاء هل تقبل او تقبلن ان اقوم انا بخطبتك دون شبكه ؟؟ ان كانت الاجابة بنعم فانا على ات الاستعداد من الغد المقبل , تلك الامور وغيرها لا تاخذ اعتباطاّ وبخاصة فى مجال العلاقات الاجتاعية والاسرية على وجه الدقة العلاقات التى تجمع بين الجنسين , اعلم جيدا ان الفيس بوك منبراّ لتبادل الراى بديمقراطية وشفافية ولكنه شكل قيما منها السلبية والاعتمادية والاتكالية وثقافة وانا مالى , حل المشكلة لا يكمن خلف الكيبورد ان كنتم تاملؤن فى حل تلك المشكله لماذا لم نسمع ان هناك شباباّ من الفيس بوك اخذوا على عاتقهم خطوة المبادة والمبادرة بذلك الامر!!, انا لم اناقش بوصفى متخصص فى علم الاجتماع ابعاد القضية مثلما ذهبيتهم ولكنى اشرت الى جزء بسيط منها ,,,,,, حدة وجدة الافكار تبع من ايجاد حلول خلاقة غير تقليدية من الاساس توصف على اناس يتمتعون من الشجاعة وقوة الباْس القدرة على تطبيقها
الأخ العزيز عمرو سوسيولوجى
تحيه طيبه وشكرا على مرورك وابداء رايك الذى نعتز به ولكن اعتقد انه مصاغ بطريقه قد يصعب استيعابها من القارىء العادى بل لا بد ان اعترف لك باننى لم استطع التوصل مائه فى المائه الى ماتقصده مع انى دارس لعلم الأجتماع فى الولايات المتحده ...فمثلا لم اعرف موقفك من التغير الثقافى والأجتماعى ...الحادث سواء شئنا ام ابينا تحت ضغط عوامل كثيره ام انك تؤمن بنظرية عن استاتكية وثبات البنى والمؤسسات الجتماعيه والنسيج القافى للمجتمع؟ وهذا ما لم يقل به على ما اعرف اى عالم او منظر فى علم الجتماع من اوجست كونت الى مدارس علم الجتماع الحديثه الكثيره
ياريت خدمة لغير المتخصص تعيد عرض افكارك بشكل مبسط ومسلسل
ومره احرى شكرا على مرورك
الأخ عمرو سوسيولوجى
عفوا سقط سهوا اسم عالم الأجتماع الرائد ابن خلدون قبل اوجست كونت
ويالمناسبه ياريت تشرح لنا وجهة نظرك بالتفصيل كيف شكل الفيسبوك قيم السلبيه والأعتماديه والأتكاليه(بالمناسبه فيه فرق بين آخر مصطلحين؟)وثقافة وانا مالى ...جزاك الله خيرا لو امدتتنا بالشرخ ربما يصلح ماده لحلقه فى البرنامج
تعليق احلام عمرنا
كما جاء فى مدونتى
--------------------
البنات مش عايزين شبكه ماشي مش مشكله
المشكله في اهلها
يعني ليه هي بنتنا بايره
وحشه
اشمعنى فلانه وفلانه وبنت فلان
هما احسن مننا
البنت انا قلت مش عايزه بس اهلي بقى اعملهم ايه
فهماني
تعليق مؤمنة
الشبكه فى نظرى تقدير من العريس للعروس وهذا التقدير ليس له نسبه مطلقه بل يتفاوت من اخر لاخر تبع لامكانيات العريس
فلا يجب على اهل العروسه ان يغالوا فى الشبكه للمظهره لكن لا يطلبوا منه اكثر من المستطاع ولا اقلمن المستطاع فقط لتقدير ابنتهم وليسالحاجه للشبكه ذاتها
دومتى بكل خير
والسلام عليكم ورحمة الله وبركاته
الاصدقاء الاعزاء
غدا 11/8/2008 يتم اذاعة حلقة خاصة فى برنامجنا الاذاعى
انت تسال والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ما عدا يوم الجمعه
وموضوع الحلقة
" الدنيا اصغر ما تتصور "
كما يمكن سماعها مباشرة فى نفس موعد اذاعتها الساعه 9.10 صباحا من خلال موقع البرنامج
http://dear.to/cairo
تمنياتنا بدوام التواصل
وايه المشكله ان يكون مفيش شبكه اصلا المهم يكون الاتنين بيحبوا بعض وعلي وفاق ومش مهم الباقي ولو الشاب مش هيقدر يجيب شبكه عادي وايه يعني المهم نسهلها ع الناس شويه
إرسال تعليق