حوارى مع شخصيه جميله من مجموعة البرنامج عمره 15 سنه

[Omar Roka] ازيك يا استاذ انا عايز اسال حضرتك سوال مهم جدا ومستنى حضرتك تفتح [أنت] خير [Omar Roka] حسنى مبارك التلفزيون المصرى جاب انو مات حقيقة ولا كذب [أنت] غير صحيح [Omar Roka] عايزين يهربو صح [أنت] انت اسمك الحقيقى ايه بالمناسبه [Omar Roka] عمر فاروق [أنت] مستعار مش كده [Omar Roka] هما بيقولو كدة عشان عايزين يهربو صح حضرتك [أنت] لأ هم بيقولوا الشائعات الموجوده بين الناس ليه اخترت اسم عمر فاروق هى الفاروق عمر [Omar Roka] وغلط جدا ان قضية حبيب العادلى تتحط على قضية مبارك كدة هما بياأجلو فى الوقت لا انا بابا اسمه فاروق فهو سمانى عمر [أنت] لأ مش غلط ضم القضيتين القانون بيقول كده لأن القضيه موضوعها واحد ومش معقول جزء من القضيه يبقى فى محكمه وجزء فى محكمه تانيه [Omar Roka] انا اخد من حضرتك واقعد ساكت مرجعش وراك مرجعش وراك [أنت] هو اصل الموضوع قانونى فقط لكن السؤال كيف ستتم المحاكمه واين ده لسه بيبحث [Omar Roka] بس عاجبنى ان القاضى كان حازم اوى معاهم وكان بيعامل حبيب العادى وقلة ارفع ايديك وقلة اطلع ادام عاجبنى عشان عمله زى اى حد عادى [أنت] دى اول مره حاكم مصرى يحاكم او وزير داخليه حتى [Omar Roka] حضرتك تقصد يعنى اننا منعرفش ازاى نحاكمهم لاننا ممرش علينا حاجة زى دى قبل كدة [أنت] ايوه بالظبط [Omar Roka] بس انا سمعت ان القاضى دة ساب القضية صح ولا لا [أنت] صح بضم القضيه لقضية مبارك [Omar Roka] بس هسال حضرتك سوال وتجاوبنى بصراحة [أنت] ماشى [Omar Roka] مصر هتتغير ولا لا ولو اتغيرت هتتغير فى اد اية [أنت] عايز الصراحه دا متوقف على نتيجة الأنتخابات ودى لا اعرفها [Omar Roka] بس تقول مين من اللى فى الانتخابات هيبوظ مصر ومين هيعدل مصر [أنت] اخطر حاجه ان فى جهات خارجيه ممكن تلعب فى البلد علشان يولعوا الدنيا زى ماحصل فى امبابه [Omar Roka] اه والله البلد بتولع [أنت] دلوقتى بيحاولوا يولعوها [Omar Roka] بس انا شايف ان اول حاجة حققت الديمقراطية فى بلدنا هى كثرة الاحزاب دى اول حاجة ديمقراطية انا مش همنعك انك تعمل حزب ولكن لو هتعمل اعمل بس لو لقيت حزبك مش حلو مش ناجح انت نفسك هتقفله صح ولا لا [Omar Roka] بس كلامى صح ولا لا عن الاحزاب وكدة [أنت] هو كثرة الأحزاب فى الأول شىء متوقع بعد الثوره لكن بعد كده حتصفصف على عدد قليل [Omar Roka] بس ديمقراطية بردو صح و الا لأ [أنت] صح كل واحد عايز يعمل حزب يعمل والناس رايها بعد كده هو اللى حيحدد الحزب اللى حيستمر المشكله فى ناس مش مقتنعين بالديمقراطيه فى قلوبهم وبيلعبوا ديمقراطيه لغاية ما يوصلوا للحكم [Omar Roka] بس انا من كلامى مع حضرتك لقيت انى فاهم ولا لا [أنت] فاهم كويس جدا ما شاء الله [Omar Roka] طيب حضرتك تعرف انا سنى كام [أنت] انت دراستك ايه سنك كام [Omar Roka] طيب اسال الاول انا سنى كام [أنت] 15 [Omar Roka] اه بس الحمدلله بتابع البلد وكدة 15 سنة [أنت] بتقرا جرايد والا تيلفزيون والا نت [Omar Roka] لا انا تلفزيون النت لما اكون عايز اتاكد من حاجة لكن بابا تلفزيون وجرايد [أنت] ليه هو مش بيحب النت [Omar Roka] لا بس بابا كبير فى السن شوية مش اوى يعنى لكن هو لما بيطلب منى حاجة بيقولى هاتها من على النت بجيبها [أنت] من كام سنه بتستخدم النت [Omar Roka] لا من زمان اوى من وانا فى كى جى 2 كنت بقعد و بلعب بس بعد كدة لقيت اعلانات بتظهر ليا عن المواقع الى هى فيها الاخبار وكدة وانا فى 1 ابتدائى بقيت يعنى ادخل كتير على المواقع دى عشان كدة بقيت متابع دلوقتى [أنت] انت عرفت الجروب ده بتاعنا ازاى [Omar Roka] اقول لحضرتك انا كنت مرة نازل من البيت فبركب المشروع بالصدفة سمعت برناج حضرتك فسمعت اسم الجروب فلما جيت دخلت علية وطلبت الانضمام [أنت] ايه المشروع ده مش فاهم [Omar Roka] انا من الاسكندرية وداخل اولى اعدادى المشروع الى هو ميكروباس نازل مع بابا فبركب الميكروباس بس عندنا بنقول علية مشروع بس كدة [أنت] ليه اسمه مشروع تعرف؟ [Omar Roka] الحقيقة لا [أنت] هو ممكن يكون مشروع للنقل [Omar Roka] اه هو يعتبر لنقل الركاب زى الاتوبيس كدة [أنت] طيب بتحلم بايه للبلد؟ نفسك يتحقق فيها ايه [Omar Roka] عارف يا استاذ انا بحلم ابقا رئيس جمهوريه عند حضرتك وقت اقولك هعمل اية فىمصر [أنت] حتعمل ايه [Omar Roka] انا اول حاجة كل يوم هتابع الحكومة بتاعتى ولو لقيت حد مش قايم بعمله و هسيبه واحذرة مرة .... مرة كمان هختار واحد جديد. رقم اتنين انا هوفر فرص عمل بطريقتى هعمل مكان فيه شباب فاهمة كومبيوتر و اخليهم يتابعو المواقع يشوفو فيها اية لو فيها حاجة غلط انا اصلحها هجيب شباب يتابعوا برامج التلفزيون عشان العشوائيات اشوف ده مكانه فين واروح اقضى على المكان اللى فيه عشؤائيات دة غير الاستفادة من القناة وهخطط لمصر وهعرف اكسب ازاى هخلى مصر تعتبر فى المقام العالى [أنت] قناة ايه [Omar Roka] قناة السويس دى فلوسا لو خليت الشعب يستفاد منها هتيجى لينا فلوس كتير ولسة حاجات تانية كتير ممكن اعملها [أنت] قول لى ايه كمان [Omar Roka] هعمل اتفاقيات كتير مع دول اوربا و امريكا هخلى صناعة نظيفة جدا واصدر واهتم بالفلاح جدا اعمل اتفاقيه مع فرنسا ومع اى دولة تكسب بلدى فلوس اقول لفرنسا احنا عندنا شباب كويسن نجيبهم عندكم واشوف مطالب دول اوربا دى مثلا عايزة شباب تشتغل فى الصناعة المتقدمة ودماغها نضيف هودى واقولهم هاخد منكم فلوس مثلا 20 مليون كل ما الشباب دول يعملو حاجة تستفادو بيها دولة تانية مثلا عايزة شباب فى الطيران وتفهم اقولهم عندنا 40 مليون كل ما يصنعو ليكم حاجة جديدة ومن امريكا هطلب انى ارجع زويل لمصر هما هيقولوا لا احنا عايزين ذويل ده مكسب لينا اطلب منهم مطالب مخفش من اوباما وفوق كل دة فلسطين هى امنى واول حاجة ههتم بيها [أنت] عمر ايام المذاكره بتقضى كام ساعه قدام النت وكام ساعه مذاكره [Omar Roka] انا ايام المذاكرة باجى من المدرسة الساعة 3 انام لحد الساعة 6 اصحى اذاكر لحد 12 اعد من 12 لوحدة اشوف اية الاخبار وانام [أنت] واصحابك فى النت بس والا بره النت [Omar Roka] لا ليا صحاب فى النت وبرة وصحاب المدرسة واعرف صحاب فى مدارس تانية [أنت] نفسك تخش كلية ايه [Omar Roka] بص هو فى كذه حاجة انا نفسى اطلع محامى الناس الغلابه اللى مظلومة هطلعهم من غير ما اخد شلن والناس اللى معاهم وغنية اخد منهم على اد الى انا محتاجه مش اكتر [أنت] طيب ياعمر انت شخصيه جميله وحتنجح ان شاء الله وانا حذيع كلامك ده فى البرنامج بس بعد رمضان لأن احنا متوقفين فى رمضان [Omar Roka] بجد يا استاذ يعنى كلامى هيطلع مع حضرتك فى رمضان [أنت] بعد رمضان ...وانا ححاول اضعه فى الصفحه هنا وفى المدونه كمان [Omar Roka] الله يخليك يا فندم وانت راجل ذوق جدا والله [أنت] ماشى ياعمر اسيبك بقى دلوقتى [Omar Roka] ماشى يا استاذ مع السلامة