يعنى ايه الواحد ممكن يكون سعيد من غير ما يشعر ...تقدر تقول لى؟
هوالموضوع مش كده بالظبط
امال الموضوع ازاى
دى نتيجة جوله فى النت عن علماء بيبحثوا فى سر السعاده
وعرفوا ايه هو سر السعاده؟
بعد مادرسوا حياة الاف من الناس توصلوا لنتائج مدهشه فعلا
زى ايه كده
من شروط السعاده ان يكون للأنسان صديقان على الأقل ...وهذا يجعله فى حاله ذهنيه صافيه
فى حالة روقان بالبلدى
ده ما وجده علماء فى جامعة ييل الأميركيه ...نتنقل بعد كده لنقطه تانيه
ودى منين
دى ذكرت فى مؤتمر الجمعيه النفسيه فى بريطانيا ...بيقولوا لو لك على الأقل اخت حنونه ستكون اكثر نفاؤلا وقدره على مواجهة صعاب الحياه
فى كمان حاجه عن الكمبيوتر والتيلفزيون
ودول ملهم والشعور بالرضا والسعاده ؟
اقل الناس سعاده او احساسا بالرضى من يقضون الساعات الطويله امامهما
زى ما بنقول باللغه الدارجه المتسمرين قدام الشاشه
انما يشعر بالسعاده والرضا من لهم نشاط اجتماعى او يقضون وقتا فى القراءه او حضور المناسبات الدينيه ...وده بحث من جامعة ميرى لاند الأميركيه
ويضاف لكده كمان ممارسة الرياضه ومش حتصدقى اللى بيقوله علماء فى الدانمرك
ليه هم بيقولوا ايه
المتزوجون بصفه عامه اسعد
يمكن عندهم ...فى ايه كمان
بيقول بحث من جامعة وور ويك البريطانيه حاجه ظريفه جدا ...التعامل مع السعداء معدى
مش المثل بيقول من جاور السعيد يسعد
بس على شرط مايكنوش ساكنين بعيد اللى حيتعامل معاهم دول
طبعا مع زحام الشوارع والمرور المتوقف مش حيقدر لا يشوفهم ولا يتعامل معاهم
فى بقى نقطه جديده تماما ...ودى ملاحظه لعالمةنفس فى جامعه فى ولاية كاليفورنيا ....بتقول ان الناس الحريصه على عرض صور اللحظات السعيده فى حياتهم بيكونوا غالبا اسعد من غيرهم
صعبه دى شويه حسب المشهور قول للزمان ارجع يازمان
لأ هى بتقول ان ده بيذكرهم بقدرتهم على الشعور بالسعاده
فى حاجه بقى ... مج الشاى ده اللى قدامى ...هو لونه مش عاجبك والا حاجه ؟ رفعته وميلته يمين وشمال
ده صحيح والسبب ان من علامات السعاده طريقة مسك كباية او مج الشاى او القهوه ....فى ناس بتحتضن بكفيها المج وهو سخن قبل ما تشرب ...طبعا فى البرد...ودول بيكونوا ناس بتقدر الصداقه وبيكونوا اهل للثقه ويعتمد عليهم ....الفكره على فكره من جامعة ييل
جولة النت النهارده ممكن نسميها .... نسميها جولةالسعاده
اصح لو قلنا جوله مع الباحثين عن سرها
